بنود 10 يجب توافرهم في عقد شراء شقتك

روحت قبل كدا تشتري شقة ليك أو لإبنك ولما بصيت في العقد مكنتش فاهم ايه اللي محتاج تتأكد أن هو موجود وايه لا! كنت محتار؟

في البداية نصيحتي ليك تكون انك لازم تاخد العقد قبل ما توقع عليه وتخلي حد متخصص يبص عليه ويراجع بنوده بند بند لأن أحياناً بيكون في لعب كتير في العقود.

بس لو عايز تعرف ايه البنود المهمة

10 بنود يجب توافرهم في عقد شراء الشقة ولو البنود دي مش مكتوبة بوضوح فأنا انصحك متوقعش على العقد أبداً.

· أولاً:- التحقق من أوراق الملكية :- هتاخد صورة من كل أوراق الملكية وترجع للحي أو الجهاز اللي تابع ليه العقار عشان تتطمن على العقار دا بإسم مين رخصة سليمة ولا لا وكام دور وكل الشروط البنائية للعقار في المنطقة دي وتتأكد إن دا الشخص اللي هيوقع لك على العقد، ولو في توكيل لازم تتأكد إن التوكيل دا ساري مش ملغي ودا سهل بإنك تاخد صورة من التوكيل وتسأل في الشهر العقاري.

· ثانياً:- توضيح أوصاف الشقة :- لازم يكون مكتوب مساحة الشقة وعدد غرفها، عدد الحمامات، المطبخ وفي الدور الكام و يمين ولا يسار الأسانسير و إن الشقة لها ما يعادل مساحتها في أرض البناء.

· ثالثاً:- سعر الشقة ومدة التقسيط :- السعر لازم يكون مكتوب صح، السعر اللي تم الاتفاق عليه ولو في أقساط متبقية تكون مكتوبة بوضوح وهتبدأ بتاريخ كام وهتنتهي بتاريخ كام وعددها والإجمالي كام، وفترة السماح لو إتأخرت في السداد وايه اللى هيحصل لو مقدرتش تدفع لأي سبب.

· رابعاً:- تسلسل الملكية :- ويبدأ من عقد الملكية أو التخصيص الصادر -جهاز المدينة أو المصرف- ( والمقصود هنا مالك الأرض الأصلي قبل ما يتم تجزئتها وبيعها لأشخاص طبيعين) والمالك الأول ثم من يأتي بعد المالك الأول من قام بالشراء منه فـ أنت لازم تكون عارف هل هو المالك الأول ولا في أكتر من مالك ودا بتعرفه لما تسأل في الحي أو الجهاز زي ما قولنا في أول الموضوع وتتأكد أن كل الملاك السابقين مكتوبين في العقد.

· خامساً:- تسليم الشقة وده ينقسم إلى جزئين :-

- الجزء الأول: مواصفات التسليم ولازم تاخد بالك إن كل اللي متفق عليه مذكور في العقد من محارة أو كهرباء أو عداد غيره (وتفاصيل أكتر عن كيفية إستلام الشقة من البائع في صفحة في البوست دا إزاي استلم شقتي)

- الجزء الثاني: معاد التسليم مكتوب و واضح بالتاريخ و آيه الشروط الجزائية اللي هتوقع على المالك لو أخل بموعد التسليم.

· سادساً:- المشروع سكني أم تجاري؟ :-

- لأننا أحياناً بنشتري على أن المشروع سكني ونتفاجأ إن في محل أو ورشة أو أي شيء مش مرغوب فيه فتح في الدور الأول فلازم يتكتب بوضوح عشان ميعودش عليك بأي ضرر بعد كدا.

- وكمان الجراچ هيستخدم في ايه خصوصاً بعد إجراءات الدولة إن الجراچ لازم يستخدم كـجراچ مش أي حاجه تانية زي مخزن مثلاً.

· سابعاً:- الأجزاء المشتركة :- الأجزاء المشتركة زي غرف السطح، المناور و الأسانسير كل ده يبقى مكتوب ملكيته على مين لأن في حاجات زي المنور والمدخل والحائط المشترك بينك وبين الجار كل دا ملكية مشتركة سواء بالمشاع زي المدخل والمنور أو بالنصف زي الحيطة اللي بينك وبين جارك الملاصق ليك. كمان الدور الأرضي والمنطقة الحرة ملكيتها لمين؟ لو انت مشتري شقة في الدور الارضي لازم يبقى مكتوب بأن لك حق انتفاع بالمنطقة الحرة أو الحديقة الخاصة بالشقة ويتكتب كام متر بالتحديد.

· ثامناً:- إتحاد الملاك إتحاد الملاك و وديعة الصيانة ودا اللي بيضمن لك إنك تحافظ على عمارتك (متتبهدلش) لأننا كلنا عارفين إن الناس بعد ما بتسكن محدش بيرضى يدفع فلوس تاني، فإنت مع وجود وديعة الصيانة وإتحاد الملاك بتضمن أن عمارتك هتفضل متحافظ عليها علطول، من مدخل وأسانسير و وإضاءة وسباكة وخلافة، فوجود إتحاد الملاك هو اللي بيقدر يحافظ وينظم العملية دي من غير خلاف بعد كدا بين السكان.

· تاسعاً:- الضرائب سواء الضرائب السابقة على تاريخ الشراء و لو كان فيه هتبقى على البائع واللآحقه هتكون على المشتري، وضرائب التصرفات العقارية و في صفحة دي هتلاقي شرح مفصل لموضوع الضرائب وعلى مين بالتحديد.

· عاشراً:- أن يكون التسليم على مراحل

بمعنى تحديد ميعاد تسليم الخرسانات وميعاد لتسليم المباني والمحاره وكل بند من البنود مع كتابة شروط جزائيه على التأخير فيها وبكدا هتضمن إلتزام الشركة بميعاد الإستلام النهائي.

في النهاية تاني أنا بنصح أن العقود تتراجع من قبل مختص ولكن انا حاولت ألم أكبر قدر من النقاط الهامة ليك عشان تكون عارف حقوقك فين.