كيف يتم حساب نسبة تحميل الشقة

اكتشف طريقة حساب نسبة التحميل

جيت تشتري شقة 150 متر وقست أبعادها لقيت الشقة 100 متر بس! وكنت مش فاهم أنت بيتضحك عليك ولا إيه ولا فين المشكلة؟

الموضوع ببساطة بسبب نسبة التحميل - بس يعني آيه نسبة التحميل ؟

عشان نشرح يعني ايه لازم نفهم الموضوع من الأول.

لما تيجي الشركة العقارية تشتري أرض فلنفرض مثلاً 1000 متر، هي مش بتبني على كامل مساحة الأرض بتبني على 40% 50% او 60% ( كل منطقة وليها شروطها البنائية )، طيب هو عشان يعوض فرق المساحة الـ 1000 متر اللي اشتراها دي لأن هو دلوقتي مش هيبني غير على 500 متر تقريباً، فبيحمل أو بيضيف نسبة من الفراغات دي على مساحة الشقة. ( ودي الفكرة العامة )

السؤال هنا كيف يتم حساب نسبة التحميل ؟ نسبة التحميل ليها طريقتين للحساب

الطريقة الاولى:- نسبة التحميل = صافي مساحة الشقة X نسبة التحميل المتفق عليها

طيب ايه هو صافي مساحة الشقة، وايه هي نسبة التحميل ؟

صافي مساحة الشقة: هو صافي المساحة الإجمالية للشقة من سقف الخرسانة اللي وخداها الشقة أو بمعنى أصح مساحة الفراغات للشقة من غرف ورسيبشين وحمامات وطرق ومطابخ + مساحة الطوب، بس خد بالك الطوب بيتحسب نص عليك والنص التاني على الجار ولو مفيش جار بيتحسب الطوب بالكامل عليك أياً كان بقا مساحة الطوب 12 سم أو 10 سم أو أكتر أو أقل.

نسبة التحميل: واللي بالحقيقة بتختلف من مكان لمكان فهتلاقي في أماكن في مصر بتحمل بنسبة 25% وفي أماكن بيوصل فيها نسبة التحميل إلى 50% وده بسبب عوامل زي هل الأرض دي فيها خدمات و مُستَغِله المنطقة دي لمنفعة الشقة ولا لا ( هل الشركة بتحمل تحميل عادي ولا لا)

الطريقة الثانية:- نسبة التحميل = إجمالي مساحة الشقة البيعية - صافي مساحة الشقة

طيب نرجع لشقتنا اللي في الأول اللي بتتباع 150متر، والشقة صافيها 100متر هنحسب نسبة التحميل بتاعتها إزاي؟ نسبة التحميل = 150 - 100 = 50متر يعني نسبة التحميل 50% من صافي الشقة

بمعنى قبل ما تشتري شقتك أدخل شقتك قيس مساحتها كلها شوف مساحة الغرف و الريسيبشن وكل جزء في الشقة كام. وجمعهم كلهم هتعرف صافي المساحة كام و بعد كده شوف الشقة البائع بيحسبها كام و أطرح دا من المساحة اللي قستها هتعرف هو بيحمل كام متر عليك زيادة .

بعد كدا القرار ليك تقبل المساحة الزيادة ولا شايف أن مبالغ فيها .

كيف يتم حساب نسبة التحميل