شقة إيجار أم شقة تمليك

سنة 2014 قررت أتجوز، وفي مرحلة شراء الشقة كانت الصدمة كبيرة الحقيقة، لأن حتى مع وجود مبلغ زي 250 ألف 300 أو حتى 350 الف مش كفايا، ولو استلفت برضوا مش هقدر اشتري شقة حتى لو قسط لأنه بمنتهى البساطة قسط الشقة بيكون معدي الـ 12 ألف أو 15 وأحياناً أكتر كمان، غير اني كمان هستلم بعد ثلاث أو أربع سنين ودا لو صدقوا في معادهم.

وعشان كدا قررت إني آخد شقة إيجار وقولت لنفسي آخد شقة بـ 3000 جنية أو حتى 3500 في الشهر و وباقي دخلي أصرف بيه على بيتي، ومبلغ الـ 300 ألف الي كنت هدفعهم مقدم أخدتهم إستثمرتهم وبعد 5 سنين الحمد لله المبلغ دا أصبح 450 ألف وروحت أشتري شقة وإنصدمت تاني صدمة ليا، لأن العقارات كلها زادت وأن الشقة الي كنت هدفع فيها مقدم 300 ألف حالياً سعرها زاد أكتر من 50% وفي حاجات زادت أكتر من كدا كمان دا غير اني صرفت أكتر من 180 ألف جنبة في أقساط الشقة الي كنت عايش فيها الخمس سنين دول، وندمت قولت ياريتني أخذت شقة تمليك من الأول حتى لو تنازلت شوية.

بس الحقيقة كان لازم الشركات العقارية تراعي دا كويس وتراعي اننا لسه في أول حياتنا و إننا حتى لو قررنا نحوش مبلغ المقدم مفيش حد هيقدر يدفع مبلغ قسط 15 ألف في الشهر احنا مش حرامية عشان دخلنا يوصل لكدا.

لازم يكون في حل عشان الناس اللي زيي مترميش فلوسها في ايجار وكأنها رمتها في الشارع.

لازم يكون في حل...