سنة 2014 قررت اتجوز، وفي مرحلة شراء الشقة كانت الصدمة كبيرة الحقيقة، لأن حتى مع وجود مبلغ زي 250 ألف 300 أو حتى 350 ألف مش كفايا، ولو أستلفت برضو مش هقدر اشتري شقة حتى لو قسط لأنه بمنتهى البساطة قسط الشقة بيكون معدي الـ 12 ألف أو 15 ألف و أحياناً أكتر كمان، غير إني كمان هستلم بعد ثلاث أو أربع سنين ودا لو صدقوا في معادهم.

وعشان كدا قررت إني آخد شقة إيجار وقولت لنفسي آخد شقة بـ 3000 جنية أو حتى 3500 في الشهر و وباقي دخلي أصرف بيه على بيتي، ومبلغ الـ 300 ألف الي كنت هدفعهم مقدم أخدتهم استثمرتهم وبعد 5 سنين الحمد لله المبلغ دا أصبح 450 ألف و روحت أشتري شقة وانصدمت تاني صدمة ليا، لأن العقارات كلها زادت وأن الشقة الي كنت هدفع فيها مقدم 300 ألف حالياً سعرها زاد أكتر من 50% وفي حاجات زادت أكتر من كدا كمان دا غير اني صرفت أكتر من 180 ألف جنبة في أقساط الشقة الي كنت عايش فيها الخمس سنين دول وندمت وقولت ياريتني اخذت شقة تمليك من الأول حتى لو تنازلت شوية بس الحقيقة كان لازم الشركات العقارية تراعي دا كويس وتراعي إننا لسه في أول حياتنا وإننا حتى لو قررنا نحوش مبلغ المقدم مفيش حد هيقدر يدفع مبلغ قسط 15 ألف في الشهر احنا مش حرمية عشان دخلنا يوصل لكدا.